Bakı Dövlət Universiteti və ARB 24 telekanalı arasında imzalanmış əməkdaşlıq müqaviləsi çərçivəsində "ARB 24 NewsLab" təlim proqramı başlayıb.

Praktik təlimlərə cəlb edilən 10 tələbə ilə görüş keçirilib. Görüşdə telekanalın  direktoru Radik İsmayılov, Departament rəhbərləri Elnur Şibliyev, Çinarə Nurmməmmədova, xidmət rəhbəri Orxan Quliyev, BDU-nun Jurnalistika fakültəsinin dekanı Vüqar Zifəroğlu, həmçinin kafedra müdirləri professor Cahangir Məmmədli, Aynur Nəsirova, Xatirə Hüseynova  iştirak ediblər.

Giriş sözü ilə  başlayan fakültənin dekanı Vüqar Zifəroğlu müsahibə mərhələsindən uğurla keçən tələbələri təbrik edib.

Telekanalın direktoru Radik İsmayılov bildirib ki, 2024-cü ilin fevralında layihənin yenidən keçirilməsi planlaşdırılır və proqram ənənəvi şəkildə hər il davam etdiriləcək.

Daha sonra telekanalın direktoru  R.İsmayılov həm layihənin iştirakçılarına, həm də Jurnalistika fakültəsinin III kurs tələbələrinə təlim keçib.

Qeyd edək ki, tələbələr 3 ay  ərzində keçiriləcək "ARB 24 NewsLab" təlim proqramında xəbər hazırlanması, nitq mədəniyyəti, görüntü, videomontaj sahələrinə yiyələnəcəklər. Tədris proqramını uğurla başa vuran iştirakçılara sertifikat veriləcək. Onların bir qismi ARB 24-də işlə təmin olunacaq.

Bu, Bakı Dövlət Universiteti və ARB 24 telekanalı arasında imzalanmış əməkdaşlıq müqaviləsi çərçivəsində reallaşan ikinci təlim proqramıdır. Birinci təlim proqramını uğurla başa vuran 5 namizəd 2022-ci il oktyabrından rəsmi şəkildə işə götürülüb.  Hazırda onlar ARB 24-də fəaliyyətlərini davam etdirirlər.